Marathi Poem for Kids | मराठी कविता चांदोबा तू असा रे कसा

संतोष भरणुके July 22, 2021 मराठी कविता

Marathi Poem for Kids Chandoba tu asa re kasa| मराठी कविता चांदोबा तू असा रे कसा : लहान मुलांच्या मनातील सर्वात आवडती गोष्ट म्हणजे चंद्र, होय आपला चांदोबा. एक दिवस ते चक्क चांदोबाशी गप्पा मारतात. गप्पा मारताना ते चांदोबाकडे खेळायला जाण्या ऐवजी चांदोबालाच खाली यायला संगतात. तुझ्या पेक्षा आम्ही इकडे किती मजा करतो ते सांगतात, आणि तू जर इकडे आलास तर तुलाही आमच्या बरोबर मजा करायला मिळेल हेही सांगतात. चला वाचू या ही छानशी कविता, नक्की आवडेल तुम्हाला. धन्यवाद !

चांदोबा :

चांदोबा चांदोबा, तू असा रे कसा,
जवळ या जरा, असे समोर बसा ।। धृ ।।

खूप छान दिसता, तुम्ही फार दुरून,
असे काय पाहता, लहानांना वरून.
कधीतरी तुम्ही या, जमिनीवर जरा,
हसा, खेळा खूप-खूप मजा करा. ।।१।।

कोणी म्हणे तुमच्या सोबत ससा राहतो.
दुडू-दुडू धावतो नी पळा-पळ करतो.
रोज त्याच्या सवे खेळून होत नाही बोर,
आम्ही पोरं येथे, बघ करतो किती शोर ।।२।।

याल जर खाली, तर छान जाईल वेळ,
रोज रोज खेळू , आपण नवा नवा खेळ,
कधी खेळू लपा-छुपी, कधी शिवणापाणी,
कधी सांगू गोष्टी, तर कधी गाऊ गाणी ।।३।।

चांदोबा चांदोबा, तू असा रे कसा,
जवळ या जरा, असे समोर बसा ।। धृ ।।

कविता आवडली असेल तर, तुमच्या मुलांनाही वाचायला सांगा आणि त्यांना शाळेत ऐकविण्यास सांगा. त्यांनाही या नवीन कवितेची मजा घेता येईल. काही सूचना असल्यास जरूर कळवा. तसेच कविता स्वतःपुरतीच न ठेवता आपल्या मित्रांसोबत सामायिक करा. आपला अनमोल वेळ दिल्याबद्दल तुमच्या सर्वांचे मनापासून आभार. धन्यवाद !